ایسته میرم یار آغلاسین
چال تاری قوی تار آغلاسین،
گول اویناسین خار آغلاسین
بوغاز گولسون دارآغلاسین،
قوی یئره غم پیاله سین
سیل گوزونون شلاله سین،
آل گونشین حواله سین
شاخ قارا قوی قار آغلاسین،
یار ندن آغلاسین گرک؟
بویون بوکولسون آی فلک،
دویونجا قویمادین گولک
سیخ ناری قوی نار آغلاسین،
خزان یئلی اسن زامان
شاختا آمان کسن زامان،
یار یاریلان کوسن زامان
کیمسه کیمیم وار آغلاسین،
صبحه تیکیلدی گوزلریم
داغلاری آشدی سوزلریم،
گیزلین الوودی کوزلریم
نی اولدو نی زار آغلاسین،
ساقی گئتیر قدح لرین
سرخوش اولاق درین درین،
سئوگی توتا کینین یئرین
کین اوزو زار زار آغلاسین...
